Иштироки масъулини “Амонатбонк” дар барномаи радиои “Азия-Плюс” вобаста ба “Рӯзи умумиҷаҳонии ҳимояи ҳуқуқи истеъмолкунандагон”
Ҳамасола дар ҷаҳон санаи 15-уми март ҳамчун Рӯзи умумиҷаҳонии ҳимояи ҳуқуқи истеъмолкунандагон ҷашн гирифта мешавад.
Ҷумҳурии Тоҷикистон низ ҳамчун узви комилҳуқуқи Созмони Милали Муттаҳид ва Иттиҳоди Давлатҳои Мустақил ин санаро бо баргузории силсилаи чорабиниҳо дар самти ҳимояи ҳуқуқи истеъмолкунандагон таҷлил менамояд.
Вобаста ба ин сана масъулини “Амонатбонк” ҷиҳати шарҳу тавзеҳи Қонуни Ҷумҳурии Тоҷикистон «Дар бораи ҳимояи ҳуқуқи истеъмолкунандагон» ва дастурамалҳои Бонки миллии Тоҷикистон дар ин самт, дар барномаи “Имкон бо Субҳон” дар радиои Азия-Плюс ширкат варзиданд.
Қайд гардид, ки дар Ҷумҳурии Тоҷикистон Қонуни Ҷумҳурии Тоҷикистон «Дар бораи ҳимояи ҳуқуқи истеъмолкунандагон» ва дигар санадҳои меъёрию ҳуқуқӣ амал мекунанд, ки муносибатҳои байни истеъмолкунандагон ва истеҳсолкунандагон, иҷрокунандагон, фурӯшандагонро ҳангоми хариду фурӯши мол (фармоиши иҷрои кор, хизматрасонӣ) ва муносибатҳои шартномавӣ ба танзим дароварда, ҳуқуқи истеъмолкунандагонро барои харидани мол ё хизматрасонии дорои сифати муносиб, ҳимояи давлатӣ ва ҷамъиятии манфиати онҳоро муқаррар ва тарзи татбиқи ин ҳуқуқҳоро муайян мекунанд.
Масъулини Бонк иброз доштанд, ки бо мақсади фароҳам овардани шароити мусоид барои ҳимояи ҳуқуқҳои истеъмолкунандагони хизматрасониҳои низоми бонкӣ, баланд бардоштани сатҳи шаффофияти фаъолияти ташкилотҳои қарзии молиявӣ ва миёнаравии молиявӣ, инчунин таҳкими боварии истеъмолкунандагон ба фаъолияти низоми бонкӣ санадҳои меъёрию-ҳуқуқӣ таҳия шуда, талаботи ҳадди ақалро барои нашри маълумот дар бораи фаъолияти ташкилотҳои қарзии молиявӣ муқаррар менамояд.
Дар идома бо шунавандагони радиои Азия-Плюс ва масъулини Бонк суолу ҷавоб сурат гирифта, иброз гардид, ки ҳангоми пайдо гардидани суол ё инки арзу шикоятҳо доир ба сатҳу сифати хизматрасониҳои бонкӣ шаҳрвандон метавонанд ба маркази тамоси Бонк тариқи рақами 1885, тавассути чат-боти сомонаи расмии Бонк, мессенҷерҳои “Телеграм” ва “Ватсап” бо рақами (900 00 48 26) муроҷиат намоянд.
